རྒྱུད་བཞི་ཡི་མཚན་དོན་ལ་དཔྱད་པ།
མེས་པོའི་ཟུངས་ཁྲག་གིས་བྲིས་པའི་རི་མོ། །
གངས་རིའི་རྣམས་ཤེས་ཀྱིས་སྐྱོང་བའི་གཅེས་ནོར། །
མི་ཚ་བུ་རྒྱུད་ལ་བདག་པའི་ལོངས་སྤྱོད། །
མཐོ་སྒང་ཁྱིམ་གཞི་ལ་ཡོད་པའི་ནོམ་པ།
།
ཐོག་མར་གླེང་སློང་བ།
ད་ལྟ་གོ་ལ་གཅིག་འགྱུར་གྱི་དུས་ཏེ། ཚན་རིག་རིག་གནས་ཀྱི་ཚད་གཞི་བླ་ནས་བླ་རུ་དང་།
དེ་དང་འབྲེལ་བའི་ལག་རྩལ་རིག་གནས་དང་། སྒྱུ་རྩལ་རིག་གནས་སོགས་མདོར་ན་རིག་གནས་གསར་བ་མང་པོ་མང་པོ་ཞིག་་ཕྱོགས་དང་།
ཕྱོགས་ཀུན་ནས་དབྱར་དུས་ཀྱི་ཤ་མོང་བཞིན་བརྡོལ་ཡོང་སྟེ། གནའ་བོའི་སྲོལ་རྒྱུན་རིག་གནས་དུ་མ་ཉམས་བཞིན་པའི་དུས་འདིར། ང་ཚོ་ལ་འཛམ་བུ་གླིང་པ་རྣམས་ཀྱི་མིག་མདུན་ན་ངོམ་རི་ཞིང་གླེང་ཆོག་པ།
ལྷག་པར་དུ་ཚན་རྩལ་རིག་པས་ཀྱང་དཔྱད་བཟོད་པའི་རིག་གནས་གསོ་བ་རིག་པ་འདི་ལྟ་བུ་ཞིག་ཡོད་པ་ནི་འུ་ཚོའི་གཟི་བརྗིད་དུ་ཆེ།
དེ་ཡང་རྒྻ་ནག་གི་དབང་འཛིན་པ་རེ་ཟུང་གིས་ལབ་ན་བོད་མི་རིགས་ཟེར་བ་འདི།
གལ་ཏེ། ཀྲུང་དབྱིང་གི་ཐུགས་ཁུར་བཀའ་དྲིན་འོག་མེད་རྒྱུ་ན། ཁོ་ཚོ་རིག་གནས་མེད་པ། ཤེས་ཡོན་མེད་པ།
ཀླ་ཀློས་རིགས། ཐང་ན་རང་ཁ་རང་གིས་གསོ་ཐུབ་པའི་རིག་པ་ཙམ་ཡང་མེད་པ་ཞིག་རེད་ཅེས་སོགས་ཤོད་ཀྱིན་ཡོད།
ཡིན་ཡང་། ད་བར་འཛམ་གླིང་ཤར་ནུབ་ཀུན་གྱིས་བོད་མི་རིགས་ཟེར་དུས་ཕུན་སུམ་ཚོགས་པའི་རིག་གནས་ཀྱིས་ཕྱུག་པའི་མི་རིགས་ཤིག་རེད་ཅེས་དང་།
ད་དུང་བོད་རིགས་ལ་བདོག་པའི་རིག་གནས་ཁག་ནི་རྒྱུ་མཚན་དང་ལྡན་པ། གནས་ལུགས་དང་མཐུན་པ། ཡ་རབ་བཟང་སྤྱོད་དང་འདྲེས་པ།
དོན་སྙིང་མཆིས་པ་རིན་ཐང་ཆེ་བ་ཤ་སྟག་རེད་ཅེས། མི་མང་པོ་ཞིག་གིས་བོད་ཀྱི་རིག་གནས་ལ་སྦྱང་འདོད་ཀྱི་འགྲམ་ཆུ་ལྡང་བཞིན་ཡོད་པ་འདི་རེད།
དེ་བས་ན། འདིར་ཡང་དེ་ལྟའི་རིན་ཐང་བྲལ་བའི་་བོད་ཀྱི་རིག་གནས་ཆེ་བ་ལྔ་ལས་གསོ་བ་རིགས་པའི་གཞུང་ལུགས་དཔལ་ལྡན་རྒྱུད་བཞིའི་མཚན་དོན་ལ་ཅུང་ཙམ་དཔྱད་པར་སྤྲོ་བ་བརྟས།
།
དེ་ལ་ལོ་རྒྱུས་ཀྱི་གུང་བསྒྲིགས་ནས་བལྟས་ན། ཁོང་ནི་ཆོས་རྒྱལ་ཁྲི་སྲོང་སྡེའུ་བཙན་དང་ཆོས་རྒྱལ་མིའི་ཨག་ཙོམ་གཉིས་ཀྱི་སྐུ་དུས་སུ་བྱོན་པ་རེད་ལ། སྐབས་དེ་དུས་བོད་ལ་རྒྱ་གར་འཕགས་པའི་ཡུལ་ནས་སངས་རྒྱས་ཀྱི་་བཀའ་དང་དེ་དག་གི་དགོངས་འགྲེལ་བསྟན་བཅོས་གྲངས་མེད་པ་་ཞིག་བསྒྱུར་དང་འགྱུར་བཞིན་པའི་སྒང་ཡིན་པའི་ཁར། ནང་པ་སངས་རྒྱས་ཀྱི་ཆོས་ལུགས་འདི་དར་ཁྱབ་ཧ་ཅང་འགྲོ་བཞིན་ཡོད། ནང་པ་སངས་རྒྱས་ཀྱི་ཆོས་ལུགས་འདི་བོད་ལ་དར་ཁྱབ་འགྲོ་སྟངས་དེ་ཡང་སངས་རྒྱས་བཅོམ་ལྡན་འདས་སྐྱེས་བུ་ཚད་མ་དང་མི་བསླུ་བ་ཡིན་པ་ཤེས་པའིོ་ཐོག་ནས། དེའི་ཞལ་ནས་གསུང་པའི་བཀའ་ཐམས་ཅད་ལ་ཚད་མ་དང་མི་བསླུ་བ་ཡིན་པར་ངེས་པ་བརྙེད་དེ་ཡིན་པས། བོད་མི་རྣམས་ཀྱི་སེམས་བསམ་པའི་གཏིང་ཤ་མཆིན་པའི་གསེང་ནས་གུས་བརྩི་འཐོབ་བཞིན་ཡོད།
དེ་ལྟར་གནང་དགོས་པའི་རྒྱུ་མཚན་ནི་ཁོང་གིས་མཛད་པའི་བསྟན་བཅོས་ལ་མི་རྣམས་ཀྱིས་གདེངས་འཇོགས་དང་ཡིན་རྟོན་བྱས་ན་འགྲོ་དོན་དཔག་མེད་འབྱུང་བ་མཁྱེན་ནས་ཡིན་པ་སྨྲོས་ཅི་དགོས། རྒྱུ་མཚན་དེ་དག་གིས་གསོ་རིག་གཞུང་ལུགས་འདིའི་མཚན་རྒྱུད་་བཞི་ཞེས་པའི་རྒྱུད་དེ་ལྟར་སྦྱར་བ་དང་། བཞི་ནི་གཞུང་འདི་ལ་ཏུམ་ཚན་བཞི་ཡོད་པས་ན་གྲངས་སྟོན་པའི་ཚིག་ཏུ་ཟད། །
གཉིས་པ་རྒྱུད་ཅེས་པ་ནི་བརྒྱུད་པའི་ཁོངས་བཙུན་པ་སྟོན་བྱེད་ཡིན་ཏེ། སངས་རྒྱས་ཀྱི་ཞལ་དྲོན་མོ་ནས་བརྒྱུད་ཡོང་བ་ལས་རྗེས་འཇུག་མཁས་པས་གསར་དུ་བརྩམ་པ་འམ། སྣོན་འཕྲི་བསྲེ་ལྷད་སོགས་བྱས་མེད་པའི་དོན་ནོ། དེ་ཡང་། སངས་རྒྱས་ཀྱི་བཀའ་ལ་མདོ་རྒྱུད་གཉིས་སུ་ཕྱེས་པ་ལས། མདོ་ཕྱོགས་ཟེར་ན་་ཕར་ཕྱིན་གྱི་ཐེགས་པ་གཙོ་བོ་དང་། རྒྱུད་ཟེར་ན་གསང་སྔགས་ཀྱི་གཞུང་ལུགས་དག་ལ་གོ་བ་རེད།
ཡང་གཅིག་བཤད་ན། ནང་པ་གཅིག་པུ་ཙམ་མ་ཡིན་པར་ཕྱི་རོལ་མི་སྟེགས་པའི་གཞུང་ལུགས་མང་པོ་ལ་ཡང་རྒྱུད་ཅེས་འབོད་པ་ཡོད་སྐད། གང་ལྟར་མདོ་དོན་དྲིལ་ནས་བཤད་ན་གཞུང་ལུགས་གང་ཞིག་རྒྱུད་ཡིན་ཕྱིན་ཆད་བརྒྱུད་པ་དྲི་མ་དང་བྲལ་བ་ཞིག་ཡིན་པའོ། །
གཞི་ཡིན་ཏེ།
མཇུག་དོན་ཡོངས་གཏན་ལས། རྩ་བ་ཐུགས་ཀྱི་རྒྱུད་འདི་ས་བོན་འདྲ། ། འདི་ལས་མ་སྐྱེས་གསོ་དཔྱད་ཡོད་མ་ཡིན།
། ཞེས་གསུངས་ཡོད།
བཤད་པའི་རྒྱུད་ཀྱི་མགོར། བསྡུས་དོན་རྩ་རྒྱུད་དེ་ལྟར་གསུངས་ལགས་ན། ། ད་ནི་བཤད་པའི་རྒྱུད་ལ་ཇི་ལྟར་བསླབ་པར་བགྱི། ། ཞེས་དྲང་སྲོང་ཡིད་ལས་སྐྱེས་ཀྱིས་སྟོན་པ་ལ་བཀའ་འདྲི་ཞུས་པའི་ཚིག་དེ་ལ་བསམ་ན་ཡང་། རྩ་རྒྱུད་ནི་རྒྱུད་ཕྱི་མ་དག་གི་དོན་མཐའ་དག་སྙིང་པོར་བསྡུས་ཏེ་གསུངས་ཡོད་པའི་རྒྱུད་ཡིན་པ་གསལ་བོར་རྟོགས་ཐུབ།
གཞན་རྩ་བའི་རྒྱུད་ནི་གང་ཟག་དབང་པོ་རབ། བློ་རྣོ་བ།
ཤེས་རབ་ཆེ་བ་དག་གི་དོན་དུ་ཚིག་གི་ལོ་མའི་རྒྱས་སྤྲོས་མཐའ་དག་་སྤངས་དེ། དོན་གྱི་འབྲས་བུ་ལ་ཁོ་ན་ལ་ཕྱོགས་ཡོད་པའི་གཞུང་ལུགས་ཤིག་ཀྱང་ཡིན་ཏེ།
ཕྱི་མ་རྒྱུད་ཀྱི་མགོར། རྩ་རྒྱུད་བཤད་རྒྱུད་མན་ངག་རྒྱུད་དང་གསུམ། ། དབང་པོ་རབ་འབྲིང་ཐ་མའི་དོན་དུ་གསུངས་ལགས་ན།
། ཞེས་སྐྱེས་བུ་དབང་པོ་རབ་ཅན་དག་གིས་རྩ་རྒྱུད་གཅིག་པུ་ཤེས་པ་ཙམ་གྱིས་ཀྱང་རྒྱུད་དོན་ཡོངས་སུ་རྟོགས་ཏེ་རྒྱུད་ཕྱི་མ་དག་ལ་བརྟེན་མི་དགོས་པ་ཡིན་ནོ།
།
བཞི།
བཤད་པའི་རྒྱུད་ཀྱི་གོ་དོིན་ནི། རྩ་རྒྱུད་གསུངས་པའི་ཕྱིས་སུ་གསུངས་པ་གང་ཞིག་རང་ཉིད་རྒྱུད་གཞན་འཆད་པའི་འགྲེལ་བ་ལྟར་གནས་པའོ་ཞེས་[4]རྒྱུད་བརྟག་གཉིས་ཀྱི་འགྲེལ་བ་ཀུན་མཁྱེན་དགོངས་རྒྱན་ཞེས་པར་འཛི་སྒར་མཁན་པོས་གསུངས་ཡོད།
ཁོང་གིས་དེ་ལྟར་གསང་སྔགས་རྒྱུད་སྡེ་སྤྱི་འགྲོ་ལྟར་བཤད་པའི་རྒྱུད་ཀྱི་དོན་བཀྲལ་བ་དེ་སྐབས་བབས་ཀྱི་བཤད་པའི་རྒྱུད་ཀྱི་དོན་དང་ཡང་མཐུན་པར་གནས།
རྒྱུད་འདིས་བཤད་བྱ་ནི་གནས་བཅུ་གཅིག་ཅེས་པ་དེ་དག་རེད།
དེས་ན་གནས་ཞེས་པ་ནི་གང་ཞིག་གང་ལ་བརྟེན་པའམ་གནས་སའི་ས་ཆ་ཡི་དོན་ཏེ། དཔེར་ན། རྒྱལ་པོའི་ཕོ་བྲང་ལ་རྒྱལ་པོ་བཞུགས་པའི་གནས་ལྟ་བའོ། སྐབས་འདིར་ཡང་། གནས་ཞེས་པའི་དོན་ལ་གོ་བ་དེ་ལྟར་བླངས་ནའབྲེལ་ཆེ་བར་སྣང་སྟེ།
རྒྱུད་འདི་ནི་དང་པོ་རྩ་བ་མདོ་ནས་བྱ་སྤྱོད་སྨན་པའི་བར་གྱི་བཤད་བྱ་བཅུ་གཅིག་པོ་བཞུགས་པའི་གནས་ཡིན་པས་སོ།
དེ་ལྟར།
རྒྱུད་འདིས་གསོ་བྱའི་ཡུལ་ལ་གང་གི་དོན་དུ་གསོ་བ་ལུས་དང་དེ་ལས་བྱུང་བའི་ནད།
གསོ་བྱེད་གཉེན་པོ་ལ་ཟས་སྤྱོད་སྨན་དཔྱད་བཞི། ཇི་ལྟར་གསོ་བ་ལ་རྣམ་པར་མ་གྱུར་བའི་ཐ་མལ་ནད་མེད་སྐབས་མི་ན་བ་གནས་པར་བྱ་བ་སྟེ།
ཚེ་བསྲིང་བ་དང་ལས་བརྟས་པར་བྱ་བ་སོགས་དང་། འདུ་བ་རྣམ་པར་གྱུར་ནས་གང་ཟག་ནད་ཀྱིས་གདུང་བ་ལ་ནད་དངོས་སུ་གསོ་བ་དང།
དེ་ལྟ་བའི་ལས་སམ་བྱ་བ་བྱེད་པའི་སྨན་པ་བཅས་ཀྱི་མཚན་ཉིད་དང་དབྱེ་བ་སོགས་རྒྱས་པར་གསུངས་ཏེ།
གསོ་བ་རིག་པའི་ལྟ་གྲུབ་བཤད་པའི་གནས་སུ་གྱུར་ཡོད། ། ། །
ལྔ།
མན་ངག་རྒྱུད། མི་བསླུ་ངེས་པར་སྟོན་པ་མན་ངག་གོ ཞེས་པ་ལྟར་མན་ངག་ཅེས་པ་ནི་པོ་ཏི་ལ་སོགས་པའི་ནང་ནས་བརྙེད་པའི་དྲང་དོན་དུ་བསྟན་ཡོད་པ་རྣམས་བླ་མ་མཁས་པ་དག་གིས་ངེས་པའི་དོན་དུ་བཀྲལ་བ་དེ་བརྒྱུད་པའི་རིམ་པ་ཡི་གདམ་པ་ཞིག་ཡིན་པར་ནཱ་རོ་པས་གསུངས།
སྤྱིར་མན་ངག་ལ་བཤད་པ་མང་ལ་འགྲེལ་བ་ཞིབ་ཚག་ཏུ་བཀོད་པ་དོན་རྒྱས་པར་བཀྲལ་བའི་་རིགས་ཤིག་དང་། ལག་ལེན་དམར་ཁྲིད་དུ་འཆད་ཅིང་དོན་ཧྲིལ་གྱིས་འདྲིལ་བ་ལུང་གི་དོན་འབྲིང་པོར་བསྟན་པའི་རིགས་ཤིག་དང་།
ཚིག་ཉུང་ལ་དོན་གནད་འདུས་པ་བསྡུས་དོན་ངོ་སྤྲོད་ཀྱི་རིགས་ཤིག་ཏེ་གསུམ་ཡོད་ཟེར།
དེས་ན་འདིར་ནི་བཤད་པའི་རྒྱུད་ལྟ་བུ་གཞུང་གི་ལྟ་གྲུབ་སོགས་བཤད་པ་ལྷུར་ལེན་པའི་སྐབས་མ་ཡིན་པར། ནད་གསོ་བའི་ལག་ལེན་གཙོ་བོར་བྱ་བའི་སྐབས་ཡིན་པས་ན། བླ་མ་བརྒྱུད་པ་ཟམ་མ་ཆད་པ་ལས་ཉེ་བར་འོང་བའི་སློབ་དཔོན་མཚན་ཉིད་ལྡན་པ་ཞིག་གིས། གསོ་བ་རིག་པའི་གཞུང་ལུགས་ཀྱི་མཐོང་བ་བརྒྱུད་པའི་ཕྱག་ལེན་མཐའ་དག་སློབ་ཕྲུག་ལ་ལག་ལེན་དམར་ཁྲིད་མ་ནོར་བར་ངེས་པར་ཏུ་སྩལ་དགོས་པས་ན་མན་ངག་གི་རྒྱུད་ཅེས་ཁྲིད་ཐབས་ཀྱི་སྒོ་ནས་མཚན་བཏག་པ་རེད་སྙམ།
མདོར་ན་གཞུང་ལུགས་སོགས་ཀྱི་བཤད་སྲོལ་ཐུན་མོང་མ་ཡིན་པའི་རིགས་ཁ་ཤས་ཡིག་ཐོག་ཏུ་འགོད་མི་རུང་བའམ།
ཡང་ན་འགོད་མི་བཏུབ་པའི་རིགས་གང་ཡིན་པ་དེ་དག་གི་དོན་སློབ་དཔོན་མཁས་པས་ལུས་ངག་གི་རྣམ་འགྱུར་གང་རུང་བརྒྱུད་སློབ་ཕྲུག་ལ་གོ་བརྡ་འཕྲོད་པར་བྱ་ལ་མན་ངག་ཏུ་བཞག་ན་མ་འགྲིགས་པ་ཡོད་ཀྱི་མ་རེད་འདོད།
མན་ངག་རྒྱུད་འདི་སྐབས་བཅོ་ལྔར་པྱེས་ཏེ་གསུངས་ཡོད།
སྤྱིར་བཏང་གི་སྐད་ཆ་ནང་བཞིན་འདིར་བསྟན་ཀྱི་སྐབས་ཞེས་པའི་དོན་ནི་དུས་ལ་གོ་དགོས་སྙམ།
ཇི་ལྟར་ཞེ་ན། འདི་ནི་དང་པོ་ཉེས་གསུམ་ནས་བཅོ་ལྔ་པ་རོ་ཙའི་བར་གྱི་ནད་མཐའ་དག་གསོ་བར་བྱེད་པའི་དུས་ཡིན་པས་སོ།
གོ་བ་དེ་ལྟར་བླངས་ན་བཤད་རྒྱུད་དུ་གནས་བཅུ་གཅིག་གིས་གསོ་བའི་རིག་པའི་ལྟ་གྲུབ་བཤད་ཡོད་པ་དང་།
རྒྱུད་འདི་ཡིས་གོང་གི་ལྟ་གྲུབ་དེ་དག་དང་ལྡན་པའི་ཐོག་ནད་དང་གཉེན་པོ་དངོས་སུ་སྤྲད་ནས་ནད་ཀྱི་དགྲ་དཔུང་ཐལ་བར་བརླག་པའི་དུས་ཡིན་པ་ཤེས་ཐུབ།
། །།
དྲུག
ཕྱི་མ་རྒྱུད་ཀྱི་མཚན་དོན་ལ་དཔྱད་པ། གཡུ་ཐོག་ཡོན་ཏན་མགོན་པོས་གསོ་བ་རིག་པའི་གཞུང་ལུགས་འདི་བརྩམ་གནང་དུས།
གོང་དུ་བཤད་ཟིན་པ་ལྟར་དགོས་པ་དུ་ལ་དགོངས་ནས། གཞུང་ལུགས་འདི་སངས་རྒྱས་བཅོམ་ལྡན་འདས་ཀྱི་བཀའ་ལྟར་དུ་བཅོས་ཡོད།
རྒྱལ་བའི་བཀའ་རྣམས་ལས་ཀྱང་། ངེས་དོན་མཐར་ཐུག་སྟོན་པའི་རྒྱུད་སྡེ་ཁག་ཅི་བཞིན་བཟོས་ཏེ་མཚན་ཡང་རྒྱུད་བཏག་ཡོད།
དེ་ལྟར། གསང་སྔགས་ཀྱི་རྒྱུད་སྡེ་གཞན་དག་ལ་རྩ་རྒྱུད་དང་བཤད་རྒྱུད་རྒྱུད་ཕྱི་མ་སོགས་གསུངས་ཡོད་པ་བཞིན།
གཞུང་ལུགས་འདི་ཡང་དེ་དག་དང་སྒོ་ཀུན་ནས་མཚུངས་པར་མཛད་པས་ན། འདིར་རྒྱུད་ཕྱི་མ་གསུངས་པ་རེད།
སྤྱིར་བཏང་རྒྱུད་ཕྱི་མ་དང་ཕྱི་མའི་ཕྱི་མ་སོགས་ནི་བཤད་རྒྱུད་དུ་འདུས་པ་ཡིན་ཏེ། སྔར་གསུངས་པའི་རྩ་རྒྱུད་དུ་དོན་བསྡུས་པས་མ་གསལ་བ་དག་ཁ་ཇེ་གསལ་ཏུ་གཏོང་བ་སོགས་བཤད་རྒྱུད་དང་གཅིག་མཚུངས་ཡིན་པས་སོ།
ཞེས་གསུངས་མཁན་ཡང་ཡོད།
ཕྱི་མ་རྒྱུད་ཀྱི་ཕྱི་མ་ཞེས་པའི་ཚིག་དེའི་དོན་ལ་མང་པོ་ཞིག་གིས་སྔ་ཕྱི་བར་གསུམ་གྱིས་ཕྱེས་པའི་ཕྱི་མ་སྟེ། ཐ་མའམ་ཡང་ན་གཞུགས་མ་ལ་གོ་བ་རེད། ཡིན་ཡང་། རྒན་རག་རྡོ་རིན་པོ་ཆེས་འདི་ལ་གོ་བ་དེ་ལྟར་བླངས་ན་མི་འགྲིགས་ཏེ། ཚིག་འདི་ཡི་དོད་དུ་ལེགས་སྦྱར་ནང་ཨུཏྟ་ར་ཞེས་པ་ཡིན་ལ། དེ་ཡི་དོན་ནི་ཕྱི་མོ་ཞེས་པའི་དོན་ཡིན་པ་ལས། མཐའ་མ་དང་གཞུགས་མ་ཞེས་པའི་དོན་མིན་ཚུལ་སོགས་གསུང་མྱོང་བ་ནས། དེ་ཡི་ཁ་ཆུ་མིག་ཆུ་འཐུང་ནས་སློབ་ཕྲུག་མང་ཆེ་བས་ཕྱི་མོ་ཞེས་པའི་དོན་ཡིན་ཚུལ་ཤོད་ཀྱིན་ཡོད།
ཡིན་ཡང་། ང་ལ་མཚོན་ན། གསུང་སྟངས་དེ་བློ་ལ་འབབ་བདེ་བ་ཞིག་ཁྱོན་ནས་མི་འདུག ཇི་ལྟེ་ཞཻ་ན། ཕྱི་མོ་ཞེས་པ་ནི་མའི་མ་སྟེ་ཨ་ཕྱི་ལ་འཇུགས་པ་དང་།
ཡང་བརྡ་རྙིང་དག་ཏུ་རྩ་བའམ་གཞི་ལའང་འཇུགས་ཚུལ་ཚིག་མཛོད་དག་ལས་གསུང་ཡོད། དེ་ལྟར་ཡིན་ན།
རྩ་རྒྱུད་ནི་བཤད་རྒྱུད་སོགས་རྒྱུད་ལྷག་མ་གསུམ་པོ་འབྱུང་སའི་རྩ་བ་ཨ་མ་ལྟར་ཡིན་པ་མངོན་སུམ་ཚན་མ་དང་མིག་མཐོང་ལག་ཟིན་ཡིན་པས་ན།
ཅིས་ཕྱིར་རྩ་རྒྱུད་ལ་ཕྱི་མོ་རྒྱུད་མ་བཏག་པ་ཡིན་ནམ་སྙམ་པ་དེ་རེད།
གང་ལྟར། རྒན་རིན་པོ་ཆེས་དེ་ལྟར་གསུང་བ་ནི། གསང་སྔགས་སྔ་འགྱུར་རྙིང་མའི་རྫོགས་ཆེན་གྱི་རྒྱུད་ལ།
སྤྱིར་ཚིག་གི་རྒྱུད་དང་དོན་གྱི་རྒྱུད་གཉིས་ཡོད་པ་ལས། དོན་གྱི་རྒྱུད་ལ་ཡང་ཐབས་དང་རང་བཞིན་གཉིས་ལས།
རང་བཞིན་རྒྱུད་ལ་གཞི་ཡི་རྒྱུད་དང་། སྙིང་པོ་རྒྱུད། མེ་ཏོག་རྒྱུད་དེ་གསུམ་དུ་ཕྱེས་པ་ལས།
དང་པོ་གཞི་ཡི་རྒྱུད་ལ། ཕྱི་མོ་རྒྱུད་ཅེས་འབོད་པ་ཡིན་པ་དེ་ལ་དགོངས་ཏེ་ཡིན་ས་རེད་སྙམ།
དེ་ཡང་གཞི་ཡི་རྒྱུད་ཅེས་པ་་ནི་དངོས་པོའི་གནས་ལུགས་ཇི་ལྟ་བ་དེ་ལ་བྱ་ཞིང་།
གཞི་དེ་ལས་སངས་རྒྱས་དང་སེམས་ཅན་ཐམས་ཅད་སྐྱེས་པ་ཡིན་ན་ཕྱི་མོ་རྒྱུད་ཟེར་བ་རེད། (འདི་དག་གི་སྐོར་རྒྱས་པར་མཁྱེན་འདོད་མཁན་དག་གིས་ཀུན་མཁྱེན་ཀློང་ཆེན་གྱི་ཐེག་མཆོག་མཛོད་ལ་གཟིགས་འཚལ།)
རྒྱལ་ཚབས་བྱམས་པས་མཛད་པའི་བྱམས་ཆོས་སྡེ་ལྔ་ཡི་ཡ་ཀྱལ་མ་ཧཱ་ཡ་ན་ཨུཏྟ་ར་ཤ་སྟྲ་ཞེས་པར་བོད་སྐད་དུ་རྒྱུད་བླ་མ་ཞེས་བསྒྱུར་ཡོད།
འདི་ལ་རྒྱུད་ཀྱི་མཁན་པོ་དག་གིས་མགྲེལ་བཤད་གནང་དུས་རྒྱུད་བླ་མ་ཞེས་པའི་དོན་ནི་རྒྱུད་གོང་མ་སྟེ
འཁོར་ལོ་ཐ་མའི་དགོངས་འགྲེལ་ངེས་དོན་མཐར་ཐུག་པ་དེ་ཡིན་པས་ན་འདི་ལས་ཡན་ན་རྒྱུད་གཞན་མེད་པ་རེད།
དེའི་ཕྱིར་ན་རྒྱུད་བླ་མའོ། ཞེས་སོགས་གསུང་གི་རེད།
རྒྱུད་གཞན་དག་ཏུ་ཨུཏྟ་ར་ཞེས་པ་དེ་ཕྱི་མ་ཞེས་པར་བསྒྱུར་བ་མང་ལ། དེ་ལྟར་བསྒྱུར་ན་ཡང་དོན་གཅིག་ཏུ་གནས་པ་ཡིན་ཏེ། ཕྱི་མ་ནི་ཐ་མའི་དོན་དང་འདྲ་སྟེ་དེ་ལས་ཕན་ན་འགྲོ་ས་མེད་པའི་དོན་ནོ།
དེ་ལྟར་ན། སྐབས་འདིར་ཕྱི་མ་རྒྱུད་ཅེས་པའི་དོན་ཡང་ཆེས་མཐར་ཐུག་གི་གསོ་ཐབས་དེ་ལས་ཕན་ན་གསོ་ཐབས་གཞན་མེད་པ། དཔེར་ན་རྒྱལ་བའི་བཀའ་རྣམས་ལས་འཁོར་ལོ་ཐ་མའི་དགོངས་དོན་ངེས་དོན་མཐར་ཐུག་པ་ལྟར་གོ་བ་བླངས་ན་དོན་དང་མཐུན་ལ།
དེ་ལྟར་བྱས་ན། བོད་གཞུང་སྨན་རྩིས་ཁང་ནས་རྒྱུད་བཞི་དབྱིན་ཡིག་ནང་བསྒྱུར་བཞིན་པ་དེའི་ནང་ཕྱི་མ་རྒྱུད་ལ་(Last Tantra)
ཞེས་བསྒྱུར་འདུག་པ་དེ་ཡང་དོན་མཐུན་པ་རེད། དབྱིན་སྐད་ནང་ན་last ཟེར་བ་དེ་ཆེས་མཐར་ཐུག་དེ་ལས་ཕན་ན་གཏམ་རྒྱུ་མེད་པ་ལ་གོ་བ་ཡང་ཡོད་དེ།
དཔེར་ན། last price is
100 ལྟ་བུའོ།
[1] སློབ་དཔོན་སེམས་དཔའ་རྡེ་རྗེས་མཛད་པའི་གྲུབ་མཐའ་སྙིང་པོ་ཀུན་བཏུས།
སྟོད་ཆ། ཤོག་བུ་148ལ། SHRI DIWAKR P/UlBLICATION, Kalimpong (W.B)
India
[3]
འཛི་སྒར་མཁན་པོ་ཕྲིན་ལས་རྡོ་རྗེས་མཛད་པའི་རྒྱུད་བརྟག་གཉིས་ཀྱི་འབྲེལ་བ་ཀུན་མཁྱེན་དགོངས་རྒྱན་ཅེས་པའི་ཤོག་ངོས་༡༡
printed by Chman
Enterprises, Darya Ganj, New Delhi
[4]འཛི་སྒར་མཁན་པོ་ཀརྨ་འཕྲིན་ལས་ཀྱིས་མཛད་པའི་བརྟག་འགྲེལ་ཀུན་མཁྱེན་དགོངས་རྒྱན་ཞེས་པའི་ཤོག་ངོས་༡༢
publishedi by Chaman Enterjprise Darya, Ganj, New Delhi in 2019
No comments:
Post a Comment